মন্ত্ৰী অজন্তা নেওগৰ সৈতে লোকনিৰ্মাণ বিভাগৰ পথ আনুষ্ঠানিকভাৱে মুকলি
বিশেষ বাৰ্তা, ৩০ জুন : অসম চৰকাৰৰ জনসংযোগ বিভাগৰ মন্ত্ৰী পীয়ূষ হাজৰিকাই আজি গোলাঘাট বিধানসভা সমষ্টিত মন্ত্ৰী অজন্তা নেওগৰ সৈতে জলসম্পদ বিভাগৰ কেইবাটাও প্ৰকল্প পৰিদৰ্শন কৰাৰ লগতে লোকনিৰ্মাণ বিভাগৰ দুটা পথ আনুষ্ঠানিকভাৱে মুকলি কৰে। মন্ত্ৰীগৰাকীয়ে প্ৰথমতে জিলাখনৰ হাঁহচৰা এলেকাত ধনশিৰি নৈৰ পাৰত সম্পূৰ্ণ হোৱা খহনীয়া প্ৰতিৰোধৰ কাম পৰিদৰ্শন কৰে । জলসম্পদ বিভাগৰ অধীনত এই স্থানত ধনশিৰি নৈৰ খহনীয়া প্ৰতিৰোধৰ বাবে ৮০০ মিটাৰ দৈৰ্ঘ্যৰ অংশত জিঅ’ বেগ স্থাপন কৰা হয়। ইয়াৰ ফলত উক্ত স্থানত খহনীয়া প্ৰতিৰোধ হৈ বৃহত্তৰ অংশ এটাত খেতি-মাটি ৰক্ষা পৰিছে। দুয়োগৰাকী মন্ত্ৰীয়ে আজি এই স্থান পৰিদৰ্শন কৰি স্থানীয় ৰাইজৰ সৈতে মত বিনিময় কৰে ।
পাছত দুয়োগৰাকী মন্ত্ৰীয়ে মুখ্যমন্ত্ৰীৰ পকীপথ নির্মাণ আঁচনিৰ অধীনত চিংফুৰা পথ, লোণপুৰীয়াত এছ এইচ-৩২ লোণপুৰীয়াৰ পৰা ২নং চিংফুৰা সংযোগী পথ আৰু মথাউৰি উদ্বোধন কৰে । লোণপুৰীয়াতে মন্ত্ৰী হাজৰিকাই এখন সভাত স্থানীয় ৰাইজক সম্বোধন কৰি ড° হিমন্ত বিশ্ব শৰ্মাৰ নেতৃত্বত ৰাজ্য চৰকাৰৰ অধীনত আন্তঃগাঁথনিৰ লগতে সামগ্ৰিক উন্নয়নৰ বাবে কৰি থকা কামসমূহৰ বিষয়ে উল্লেখ কৰে । ভাষণ প্ৰসংগত মন্ত্ৰীগৰাকীয়ে মন্তব্য কৰে যে নদীৰ মথাউৰিত পকীপথ নিৰ্মাণৰ জৰিয়তে কেৱল মথাউৰি সুৰক্ষিত হোৱাই নহয়, নৈপৰীয়া ৰাইজৰ যাতায়াতৰ ক্ষেত্ৰতো যথেষ্ট সহায় হৈছে ।
The post গোলাঘাটত জলসম্পদ বিভাগৰ প্ৰকল্প-মথাউৰি পৰিদৰ্শন মন্ত্ৰী পীয়ূষ হাজৰিকাৰ appeared first on নিয়মীয়া বাৰ্তা.
